A atención psicopedagóxica aborda diversas liñas de actuación cara a unha mellor calidade de vida dos rapaces e rapazas integrando a colaboración activa das familias e dos centros educativos. Traballamos dende a máxima confidencialidade e profesionalidade para atender as necesidades persoais e específicas de cada familia. Abordamos a intervención tanto nos seus aspectos motores coma cognitivos, para favorecer e contribuír a un desenvolvemento integral, sostido e sensible do neno/a ou adolescente.

A intervención psicomotora vai encamiñada a que cada neno/a sexa considerado como suxeito que pode sentir, expresarse, representarse co seu corpo en relación cos demais, co espazo, cos obxectos. Sentir os seus límites, as súas tensións, dificultades, capacidades. Traballamos a través do movemento e da acción compartida para controlar a impulsividade e agresividade.

A intervención cognitiva desprega estratexias encamiñadas a paliar os déficits cognitivos relacionados coa toma de decisións entre alternativas, toma de perspectiva social, autoestima, amplitude de estratexias de solución de problemas, percepción de emocións, etc.

A atención a rapaces e rapazas con altas capacidades conforma unha liña de actuación centrada na educación das diferentes intelixencias do alumnado, tanto polo que se refire ás competencias lingüísticas, sociais e matemáticas como na xestión das emocións e a autoestima.

A atención ás conductas disruptivas engloba un conxunto de accións encamiñadas a paliar as conductas inapropiadas dos cativos e cativas, especialmente cando aparecen formas de agresividade, e que se manifesta nos contextos educativos e familiares.